సాహిత్యము-సౌహిత్యము – 45 : భారతార్థంలో నిను నిను నిన్ను నిన్ను మరి నిన్నును నిన్నును నిన్ను నిన్నునున్

శ్రీశారదా కారుణ్య కౌముది|
17—03—2017;  శనివారము.”సాహిత్యము—సౌహిత్యము~45″. ~ “పునరుక్తి చమత్కృతి” పరంపరలో ఈ వారంకూడా క్రితంవారం ‘చంపకమాల‘ పద్యపాదసమస్యనే పరికిద్దాం. పూరణచేసిన కవిగారుకూడా శ్రీ మోచర్ల వెంకన్నగారే!సమస్యని మళ్ళీ ఇక్కడ సౌలభ్యంకోసం ఉదహరించుకుందాం.సమస్య:—“నిను నిను నిన్ను నిన్ను మరి నిన్నును నిన్నును నిన్ను నిన్నునున్ “|

ఇది ఇక్కడ భారతార్థంలో పూరించబడింది.

“అనఘ, సురాపగాతనయ! అర్కతనూజ! విచిత్రవీర్యనం

దన! గురుపుత్ర! ద్రోణ! కృప! నాగపురీశ్వర! దుస్ససేన! ర 

మ్మనుమనె రాజసూయము యమాత్మజుడిప్పుడు చేయబూని, తా

నిను నిను నిన్ను నిన్ను మరి నిన్నును నిన్నును నిన్ను నిన్నునున్ “|

ధర్మరాజు రాజసూయయాగం చేయబోతున్నాడు. ఆ సందర్భంలో,  నకుల,సహదేవులని హస్తినాపురానికి పంపిస్తూ అక్కడ రాజసభలో వేంచేసివున్న మహామహులందరినీ రాజసూయానికి సాదరంగా ఆహ్వానించవలసినదిగా ధర్మనందనుడు ఆదేశించేడు. ఆ ఆదేశం మేరకి మాద్రినందనులైన నకుల-సహదేవులు హస్తినాపురం చేరుకుని, కౌరవ రాజసభకివెళ్ళి, ఆ సభని అలంకరించిన పెద్దలందరిని పేరు-పేరునా ఈ విధంగా సగౌరవంగా రాజసూయానికి స్వాగతిస్తున్నారు.

“పుణ్యపురుషుడవైన ఓ భీష్మా(గంగాతనయా)! సూర్యతనయుడవైన ఓ కర్ణా! విచిత్రవీర్య చక్రవర్తి నందనుడవైన ఓ ధృతరాష్ట్రమహారాజా!  గురుపుత్రుడవైన ఓ అశ్వత్థామా! ఓ ద్రోణాచార్యవర్యా! ఓ కృపాచార్యా!  హస్తినాపుర సామ్రాజ్యానికి రారాజువైన ఓ దుర్యోధనా! ఓ దుశ్శాసనా! యమధర్మరాజు వరప్రభావంవలన జన్మించిన మా అన్నగారు, ధర్మరాజు రాజసూయయాగం చేయబోతున్నారు. ఆ యాగసందర్శనానికి,  మిమ్మల్నందరినీ, పేరు-పేరునా పిలవ వలసినదిగా ఆజ్ఞాపించి, వారు మమ్మల్ని యిక్కడకి పంపించేరు”.

భాగవతార్థంలో ఈ సమస్యాపూరణాన్ని వచ్చేవారం తిలకిద్దాం!

స్వస్తి||