సాహిత్యము-సౌహిత్యము – 25 : కన్యకు నీకు ఇంక పది కావలె, కస్తురి రంగనాయకా

శ్రీశారదా వాత్సల్య గఙ్గ :—
28—10—2017; శనివారము.

సాహిత్యము–సౌహిత్యము~25.

ఈ వారంకూడా జ్యోతిషశాస్త్ర సంబంధమైన విషయమే చూద్దాం. ఒక తెలుగు పద్యం పరికిద్దాం.

“కన్యకు ఐదు జంఘలును కన్యకు
ఆరు కుచంబు లెన్నగా,
కన్యకు నాల్గు కన్బొమలు కన్యకు
ఏడు విశాల నేత్రముల్ ,
కన్యకు ద్వాదశంబు ఉలికౌనును
కల్గు సులక్షణాఢ్య కా
కన్యకు నీకు ఇంక పది కావలె,
కస్తురి రంగనాయకా“!

మామూలు శబ్దార్థజ్ఞానంతో ఈ పద్యానికి తాత్పర్యంచెపితే అది విపరీతంగావుంటుంది. అలాగ చెపితే ఎలాగవుంటుందో చూద్దాం.

“(వివాహము కావలసిన) కన్యకి ఐదు పిక్కలున్నాయి. ఆమెకి ఆరు వక్షోజాలు ఉన్నాయి. నాలుగు కనుబొమలు ఉన్నాయి. ఆరున్నొక్క విశాలమైన నయనాలున్నాయి. సన్నని నడుములు పన్నెండున్నాయి. ఇలాంటి మంచి లక్షణాలన్నువున్న ఆ గొప్ప వధువు నీకు అన్ని విధాలా తగినది కనక, ఓ కస్తూరి రంగనాయకా! నీవు ఆ కన్యని వివాహంచేసుకుంటే నీకు అన్నివిధాలా అనువైన దాంపత్యంస్థిరపడుతుంది-అని కవిగారి మాట.

మొహమాటం పడడానికి, వరుడు కస్తూరి రంగనాయక ప్రభువు. ఆయనకి అన్నీ తెలుసు. కవిహృదయం బాగా తెలుసు. కవి చమత్కారాల ముసుగులు ఆయనదగ్గర ప్రక్కకి తప్పుకుని దండంపెడతాయి. అప్పుడు ఆయా మాటలన్నీ ఆయనకి తమ అసలు-సిసలైన అర్థాలనన్నీ అందంగా బోధపడేటట్లు విన్నవించుకుంటాయి. ఆ అర్థాలిప్పుడు చూడవచ్చు.

ఇక్కడ కన్యకి అంటే, జ్యోతిషశాస్త్సపరంగా-కన్యారాశికి- అనే అర్థం తీసుకుంటే పెడర్ఠాలన్నీ మాయమైపోయి, అసలు అర్థాలు ప్రత్యక్షమౌతాయి.

“కన్యకి ఐదు జంఘలు= కన్యారాశికి ఐదవస్థానమైన మకరం/మొసలి ఆకారంవున్న అందమైన పిక్కలు,
కన్యకు ఆరు కుచంబులు=కన్యారాశికి ఆరవస్థానం-కుంభం-అంటే పుష్టీవంతమైన వక్షోజాలు,
కన్యకు నాల్గు కన్బొమలు=కన్యకి 4—ధనుస్సు, విల్లు రూపంలో కనుబొమలు
కన్యకు ఏడు విశాలనేత్రముల్ =కన్యకి-7—మీనం- అంటే చేప రూపమున్నఅందమైన విశాల నయనాలు,
కన్యకు ద్వాదశంబు ఉలి కౌను=కన్యకి-12— సింహం,ఉలి కౌను=సన్నని నడుము—అంటే సింహంలాగ సన్నని నడుము కలది;
సులక్షణాఢ్య=శుభలక్షణాలు కలిగిన వారిలో గొప్పది,
కన్యకు నీకు ఇంక పది కావలె, కస్తురి రంగనాయకా!= కన్యకు—10—మిథునం ఓ కస్తూరి రంగనాయకా! అటువంటి దివ్యగుణశోభితమైన ఆ కన్యకి-నీకు
దాంపత్యం ఏర్పడేలాగ చేసుకో స్వామీ!

పై విధంగా అన్వయం చెప్పుకుంటే విషయం వివరంగా బోధపడుతుంది.

స్వస్తి ||