ఘోరకరాగ్రతలంబున

శ్రీశారదా వాత్సల్య కౌముదీ :—

13—08—2017; ఆదివారం. 05-50AM.

ఇతరములు—Miscellany.

ఈ శీర్షికలో ఈరోజు నా ప్రాణమిత్రుడు, శ్రీ ఎం.ఎ.వహాబ్ జీ సందేహంతీర్చే ప్రయత్నంచేస్తాను.

ఒక తెలుగు ప్రముఖదినపత్రికలో పోతనగారి భాగవతంలో వర్ణింపబడిన ఒక ఘట్టం అనుచితసంఘటనగా ఒక భాగవతప్రియపాఠకుడు అభిప్రాయపడిన వార్తని నా మిత్రుడు నాకు పంపి ఈ అంశంపైన నా వాస్తవికవిశ్లేషణని కోరేడు. ఈ అంశం ఈ రోజు మన చర్చకి విషయం. పోతనభాగవతంలో జరిగిన వృత్తాంతం  పత్రికలో సరిగానే వివరింౘబడింది. కృష్ణుడు రజకుడిని రాజుగారి దుస్తులలో కొన్ని తాను, బలరాముడు, గోపబాలురు ధరించడానికి యిమ్మని యాచిస్తాడు. అతడు పరుషమైన పదజాలంతో కృష్ణాదులని దూషించి,తగిననకారణంచెప్పి దుస్తులు యివ్వడు. 7—8 సంవత్సరాల వయస్సున్న కృష్ణుడు తన “ఘోరకరాగ్రతలంబున” అంటే భయంకరమైన వ్రేళ్ళకొనలు కలిగిన తన అరచేయితో రజకశిరస్సు తెగకొట్టి చంపేడు.

మూల వ్యాససంస్కృతభాగవతంలో కూడా యీ సంఘటన ఇంచుమించు ఇలాగే వర్ణించబడింది. సంస్కృతంలోని “హరివంశమహాపురాణం” లో కూడా ఈ ఘటన రమారమి ఇలాగే వివరించబడింది.

సంస్కృతంలోని “శ్రీవిష్ణుపురాణం” లో కూడా ఈ సందర్భం సుమారు ఇలాగే చిత్రించబడింది. శ్రీకృష్ణుడి వృష్ణివంశానికి కులగురువు, పురోహితుడు, కృష్ణావతారరహస్యం తెలిసినవాడు, పరమవైష్ణవాచార్యుడు, కృష్ణుడికి “కృష్ణః” అని పేరుపెట్టిన మహానుభావుడు ఐన శ్రీ గర్గాచార్యులు వారు స్వయంగా “గర్గసంహితా” అనే పరమప్రామాణిక శ్రీకృష్ణచరిత్ర రచించేరు. ఇది కేవలం శ్రీకృష్ణగాథ

మాత్రమే! ఈ పవిత్రగ్రంథంలో 10 అధ్యాయాలున్నాయి. ఈ అధ్యాయాలని “ఖండములు” అంటారు. దీనిలో ఐదవది “మథురాఖండము”. ఈ ఖండంలో ఐదవ అధ్యాయంలో రజకవధ వృత్తాంతం మిగిలిన గ్రంథాలలో వున్నట్లే వ్రాయబడినప్పటికీ, మనకి కీలకమైన బోధపరిచే అదనపు వివరణ ఈ విధంగా చెప్పబడింది.

“ఏవం ప్రవదతః తస్య 
రజకస్య యదూత్తమః |
జహార మస్తకం సద్యః
కరాగ్రేణైవ లీలయా || 40 ||

తత్ జ్యోతిః శ్రీఘనశ్యామే 
లీనం జాతం——- |” 41 (పూర్వార్థం)|

“ఇలాగ పరుషభాషణం చేస్తున్న రజకుని శిరస్సుని కృష్టుడు తన కరాగ్రంతో ‘లీల‘ గా ఖండించేడు. వెంటనే ఆ రజకునిలోనుండి ఒక తేజస్సు బయటికి వచ్చి శ్రీకృష్ణుడిలో లీనమయ్యింది”.

పై శ్రోకాలలో ‘లీల’ అనేమాట, రజకుడిలోనుంచి కాంతిపుంజం బయటికివచ్చి కృష్ణుడిలో కలవడం కీలకమైన అంశాలు. ఈ రజకుడు కేవలం రాక్షసాంశతో పుట్టేడు. కంసుడు పూర్వజన్మలో కాలనేమిఅనేరాక్షసుడు. అతడి అనుచరులలో చాలామంది రాక్షసులే. అటువంటి రాక్షసులలో ఈ రజకుడు ఒకడు. కృష్ణుడి అవతార ఉద్దేశ్యాలలో ఈ ఆసురీజన్ములని సంహరించడం, ఉగ్రసేనాది దివ్యాంశ సంభూతులని రక్షించడం ఒకముఖ్య కర్తవ్యం. ఇక్కడ రజకుడంటే మన ఈ కాలంలోని రజకుడిగా భావించకూడదు. కేవలం తెలుగు అనువాదాలకే పరిమితమై అభిప్రాయాలు ఏర్పరచుకోకూడదు.

పైగా ఈ సందర్భంలోలాగ సమానకథా ఘట్టాలు వేర్వేరు సంస్కృతమూలాలలో ఎలావున్నాయోకూడా పరిశీలిస్తేకాని కీలకాంశాలు బోధపడవు. భాగవతం,హరివంశం,విష్ణుపురాణం వంటి గ్రంథాలలో కృష్టకథ కొన్ని అధ్యాయాలకిమాత్రమే పరిమితమై వుంటుంది. అందువలన కృష్ణకథలోజరిగిన అన్నిఘట్టాల పూర్తివివరాలు ఎంతోకొంతమేరకి లభించాలంటే గర్గసంహితవంటివి సహాయపడతాయి.

శ్రీకృష్ణావతారం ప్రధానంగా “లీలావతారం” అనిచెప్పాలి. అంతేకాక తాను ఉద్ధరించిన (సంహరించడంకాదు) రాక్షసులని వెంటనే తనలోకలుపుకుని వారికి ముక్తినిస్తాడు. భక్తులకి వారిస్థితిగతులనిబట్టి

కాలాంతరంలో మోక్షమిస్తాడు. అందువలన రజక ఉద్ధరణ జరిగింది తప్ప రజకవధ జరగలేదు. బాహ్యదృష్టికి ఘోరకర్మగా కనిపించే  దైవలీల లోచూపుతో గ్రహిస్తేతప్ప సృష్టిగతితత్త్వరహస్యాలు అవగాహనకి రావు.

స్వస్తి||