Fun facts –7
05–08–2017, శనివారము.
వాస్తవాలు—వినోదాలు–7.
1. 1963 నుండి 1969 వరకు అమెరికా అధ్యక్షపదవిలో వున్న లిండన్ జాన్సన్ (Lyndon Johnson) 15 సంవత్సరాలవయస్సులోనే తన యిల్లు విడిచిపెట్టి ఒక్కడూ బయటప్రపంచంలోకి వెళ్ళిపోయేడుట! ఒక సంవత్సరంపాటు దేశదిమ్మరిగా తిరిగేడట! నారింజతోటలలో కూలికి నారింజ పళ్ళు యేరిపెట్టడంద్వారాను, యెంగిలిగిన్నెలు-కంచాలు శుభ్రం చేయడంద్వారాను ఆ సమయంలో తన తిండికిసరిపడ డబ్బు సంపాదించుకొనేవాడట! ఆ తరువాత కొంతకాలం రహదారి నిర్మాణంకూలిపనులవారి జట్టులో చేరి పొట్టపోసుకున్నాడట! ఆ తరవాత చదువుకోవడం ప్రారంభించేడుట. కళాశాలవిద్యనభ్యసించడంకోసం కొంతసమయం కళాశాల ద్వారపాలుడు(part-time college janitor)గా పనిచేసి తన విద్యాభ్యాసం పూర్తి చేసుకున్నాడుట!
2. ఒకపక్షికోసం వేలంలో చెల్లించబడిన అత్యధిక మొత్తం 9,000 పౌండ్లుట! ఇంతకీ ఆ పక్షి ఎగిరేదికాదు. ఎందుకంటే అది ప్రాణమున్న పక్షి కానే కాదు. అది ౘక్కగా తయారుచేయబడిన పక్షిబొమ్మ మాత్రమే! అసలుపక్షి ఎలావుంటుందో అచ్చంగా అలాగే ఆ బొమ్మపక్షికూడా వుంటుంది. పెయ్యకి చేటపెయ్యలాగ ఎప్పుడో మరణించిన ఆ పక్షి అసలు శరీరంలోనే తగిన ద్రవ్యాలు కూరి దానిని సజీవపక్షిగా మలచడం జరిగింది. 1971 లో ఐస్ లేండ్ నేచురల్ హిస్టరీ మ్యూజియం వారు సోత్ బే వేలంపాట కేంద్రంలో దానిని కొన్నారు. ఆ పక్షి నార్త్ అట్లాంటిక్ సముద్రసీమకి చెందిన ది గ్రేట్ ఆక్ (the Great Auk) సంతతికి చెందిన ఎగరలేని పక్షి. అన్నింటికన్న ముఖ్యమైనది ఆ జాతి 19 వ శతాబ్దిలోనే పూర్తిగా అంతరించి పోయింది. అందువల్లే అది అంత అబ్బురమైపోయింది. పైగా అంత ధర పలికింది.
3. అమెరికాదేశానికి మొట్టమొదటి అధ్యక్షుడైన జార్జ్ వాషింగ్టన్ బ్రిటిష్ వారి సైన్యంలో ఆరు సంవత్సరాలు పనిచేసి కల్నలు పదవినికూడా పొందేడుట! ఆ ఆరుసంవత్సరాల ఆంగ్లేయసైన్య ఉద్యోగ అనుభవాన్ని అమెరికన్ స్వాతంత్ర్య యుద్ధ సైన్యాన్ని విజయం దిశగా మళ్ళించి తన పోరాటంలో సఫలీ కృతుడవ్వడానికి వినియోగించుకున్నాడు.
స్వస్తి||
