శ్రీ శిక్షాష్టకమ్ – మొదటి శ్లోకం

శ్రీశారదా వాత్సల్య స్ఫూర్తిః

(21-5-17):

ఇప్పుడు శ్రీమాత వ్రాయించబోయే విషయం మన డా.శ్రీనివాస్ కి అత్యంతప్రియవిషయం. వెళ్ళినపుడల్లా మళ్ళీమళ్ళీ తనకి తెలిసినదే ఐనా అంతే! శ్రీకృష్ణచైతన్యమహాప్రభువులు “శ్రీ శిక్షాష్టకమ్ ” అనే ఒక పరమరమ్యమైన అష్టకం ఒక్కటే రచించారు. అది సర్వవేదాంత తత్త్వసారం. తిక్కనగారు తమ తెలుగు భారతంలో వ్యాసభగవానుని వర్ణించే రెండు సందర్భాలలో ఇలా అన్నారు:

1.”ఆగమ పుంజ పదార్థ తత్త్వ నిస్సంశయకారుడు“.
2.”నిర్వాణ దాన క్రియా శీలుడు“.

ఈ రెండు విశేషణాలు మహాప్రభువుకి కూడావర్తిస్తాయి. అంటే అష్టాదశపురాణాలు, భారతం, భాగవతం, బ్రహ్మసూత్రాలు వంటి అనేక అలౌకిక అపూర్వ రచనల సంపూర్ణ సార స్వరూపమే ఈ “శిష్టాష్టకం”!
ఈ పరమ పవిత్ర గ్రంథంలోని మొదటి శ్లోకం మనం చర్చించుకోబోతున్నాం!

“చేతో దర్పణ మార్జనం
భవమహా దావాగ్ని నిర్వాపణం|
శ్రేయః కైరవ చంద్రికా వితరణం
విద్యా వధూ జీవనమ్ |
ఆనందాంబుధి వర్ధనం ప్రతిపదం
పూర్ణామృతాస్వాదనం|
సర్వాత్మస్నపనం పరం విజయతే
శ్రీకృష్ణ సంకీర్తనమ్ “||ప్రతి పదార్థము:
చేతోదర్పణమార్జనం=మనసు అనే (తరచు ఏదో ఒక కారణంగా మకిలి పట్టే లక్షణం ఉన్న) అద్దాన్ని ౘక్కగా (ఎల్లప్పుడూ) శుభ్రం చేసేది,
భవమహా దావాగ్ని నిర్వాపణం= సంసార వికారం కలిగిన జీవుడి చావు-పుట్టుకల పరంపర అనే దావానలాన్ని నిర్మూలించ గలిగినది,
శ్రేయః కైరవ చంద్రికా వితరణం= కృష్ణానుగ్రహప్రాప్తికోసం తపించే భక్తమనస్సులనే కలువలకి నిత్యానందక్షేమం అనే వెన్నెల వెలుగుల ౘల్లని ప్రసారమైనది,
విద్యా వధూ జీవనం= కృష్ణదేవునియందు ఎడతెగని పరాభక్తి అనే దివ్యవిద్యావధువుకి ప్రాణస్వరూపమైనది,
ఆనందాంబుధి వర్ధనం= కృష్ణప్రీతి అనే  ఆనంద సాగరాన్నినిరంతరం ఉప్పొంగచేసేది,
ప్రతిపదం పూర్ణామృతాస్వాదనం= అడుగడుగులోను దివ్యానందామృతసేవనం చేయించేది,
సర్వాత్మస్నపనం=కృష్షునియందు నిత్యనిర్మలస్నేహభావాన్నిపెంపొందింపచేసేది,
విజయతే శ్రీకృష్ణ సంకీర్తనం=అయిన అటువంటి శ్రీకృష్ణసంకీర్తనం ఎల్లప్పుడు సర్వోత్కృష్ట స్థితిని పొందుతోంది.

(సశేషం)